२६ ,काठमाण्डौ
प्रायः सुक्रबार मात्र नयाँ फिल्म हरुको प्रथम प्रदर्शन गर्ने परम्परा तोड्दै दुई बलिउड फिल्म बिहीबार नै नेपाली हलमा रिलिज भएका छन् । जनैपूर्णिमा तथा रक्षाबन्धन पर्वको मुखैमा आएर आमिर खान को ‘लालसिंह चड्ढा’ र अक्षय कुमारको ‘रक्षाबन्धन’ रिलिज भएका हुन् । यो साता हलिउड र नेपाली फिल्म प्रदर्शन हुने छैनन् ।
‘लाल सिंह चड्ढा’मा आमिर र करिना कपुरको मुख्य भूमिका छ । टम ह्यांक्स स्टारर सन् ११९९४ को हलिउड फिल्म ‘फरेस्ट गम्प’को रिमेक रहेको फिल्मले शारीरिक अक्षमताको बाबजुद लाल नामक पात्रले सैन्य, व्यावसायिक र पारिवारिक जीवनमा हासिल गर्ने उपलब्धिको कथा भन्छ ।
भारतीय पूर्वप्रधानमन्त्री इन्दिरा गान्धीको हत्यादेखि अन्ना हजारेको भ्रष्टाचार आन्दोलनसम्मको राजनीतिक घटनाक्रमको पृष्ठभूमिमा बनेको यो फिल्मले एउटा पात्रको आन्तरिक यात्राको कथा समेत पेश गर्छ । किरण रावले निर्देशन गरेको फिल्ममा शाहरुख खान र नागा चैतन्यले पनि केमियो भूमिका निर्वाह गरेका छन् । ‘लाल सिंह चड्ढा ‘लाई हलिउड कम्पनी प्यारामाउन्ट पिक्चर्सले विश्वव्यापी वितरण गरेको छ ।
१ घण्टा ४८ मिनेट लामो फिल्म रक्षाबन्धनमा अक्षयकुमार र भूमि पेड्नेकरको मुख्य भूमिका छ । दाजुबहिनीको सम्बन्धको कथा पेश गर्ने फिल्मलाई आनन्द एल रायले निर्देशन गरेका हुन् । कमेडी ड्रामा फिल्मले रक्षाबन्धनको महत्वबारे समेत प्रष्ट पार्छ ।