प्युठान, १ असार
स्वर्गद्वारी नगरपालिका-४ भिङग्रीस्थित सडकमा पिबि १० जिजेड ०२७९ नम्बरको
बोलेरो पिकअप जिप बुधबार बिहान दुर्घटना हुँदा जिपमा सवार भारत उत्तर प्रदेश बस्ने ६५
वर्षीय बिक्की नाउको मृत्यु भएको छ । दुर्घटनामा गम्भीर घाइते भएका उनको उपचारको
लागि प्राथमिक स्वास्थ्य चौकी भिङग्री प्युठानतर्फ लैजाने क्रममा बाटोमै मृत्यु भएको हो ।
भारत उत्तर प्रदेशबाट स्वर्गद्वारी दर्शनको लागि आएको उक्त जिप दर्शन पश्चात
भिङग्रीतर्फ फर्कने क्रममा अचानक अनियन्त्रित भई दुर्घटना भएको थियो । दुर्घटनामा घाइते
भएका जिपका सवार चालक समेत ८ जनाको सोही प्राथमिक स्वास्थ्य चौकी लगिएकोमा ६
जनालाई थप उपचारको लागि भैरहवातर्फ पठाइएको छ । घाइतेमध्ये १ जनाको अवस्था
गम्भीर, २ जना मध्यम र ५ जना सामान्य रहेका छन् ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
