५ असोज
कैलालीमा आज एकै दिन दुई जना मृत फेला परेका छन् । धनगढी उपमहानगरपालिका र गोदावरी नगरपालिका गरी दुई ठाउँमा दुई जना मृत फेला परेको प्रहरीले जनाएको छ ।
गोदावरी नगरपालिका–१२ शान्तिनगरका २५ वर्षीय मदन बडेला आफ्नै घरअगाडि मृत फेला परेका हुन् । उनी आज बिहान आफ्नै घरको आँगनमा मृत अवस्थामा भेटिएको जिल्ला प्रहरी कार्यालय कैलालीका प्रवक्ता वेदप्रकाश जोशीले जानकारी दिए ।
बडेलाको टाउको र खुट्टामा चोटपटक लागेको देखिएकाले हत्याको आशंका गरिएको जोशीले बताए । यस्तै आजै बिहान धनगढीमा एक वृद्ध मृत फेला परेका छन् । धनगढी उपमहानगरपालिका–१ त्रिवेणी चोकमा कञ्चनपुरको कृष्णनगरपालिका–८ का ७४ वर्षीय धनसिंह जेठारा मृत फेला परेको प्रहरीले जनाएको छ ।
प्रवक्ता जोशीका अनुसार छोरीको घर आएका ती वृद्ध मंगलबार साँझ बाहिर निस्किएका थिए । अबेरसम्म नफर्किएपछि खोजी गर्दै जाँदा बुधबार बिहान मृत फेला परेका जोशीले बताए । दुवै घटनाबारे अनुसन्धान भइरहेको उनले जानकारी दिए ।