१, असोज
सुदुरपश्चिममा परेको लगातारको वर्षाले सुदुरपश्चिमका विभिन्न जिल्लामा प्रभाव पारेको छ । हिजो साँझ अछाममा परेको भिषण बर्षा पश्चात आएको बाढीपहिरोले ठूलो धनजनको क्षति गरेको छ।
जिल्ला प्रहरी कार्यालय अछामका अनुसार पहिरोले कमलबजार नगरपालिका र तुर्माखाँद गाउँपालिकामा चारवटाभन्दा धेरै घर पुरेको छ।
पहिरोले कमलबजार नगरपालिका–६ मा दुई घर र तुर्माखाँद गाउँपालिका–५ मा दुई घर पुरिएका प्रारम्भिक जानकारी आएको प्रहरीले जनाएको छ।
कमलबजार –६ मा पहिरोले घरभित्र पुरिएका ४ जनाको शव निकालिएको र बेपत्ता तीन जनाको खोजी भइरहेको अछाम प्रहरी प्रमुख, डीएसपी नारायण डाँगीले नेपाल लाइभलाई बताए। उनका अनुसार कमलबजारबाट ७ जनालाई जीवितै उद्धार गरिएको छ।
यसै गरी तुर्माखाँद–५ मा पनि ९ जना बेपत्ता भएको खबर आएको डीएसपी डाँगीले बताए। त्यहाँका लागि प्रहरी घटनास्थल पुग्दैछ भने कमलबजारमा प्रहरी निरीक्षकको नेतृत्वमा टोली खटिएको छ।
अहिले पनि वर्षा भइरहेकाले उद्धार तथा खोजीमा समस्या भएको डीएसपी डाँगीले बताए।